「移民」— 心得分享
小編相信「移民」係一件好個人嘅事亦都冇乜絕對正面反面嘅答案
個人覺得： 香港有時太物質主義化
上一代家庭嘅「愛」好多時建基於投放左幾多錢去培育個小朋友
而忽略左「家庭關係」嘅建立
或者就係因為咁搞到依一代同上一代嘅關係有少少疏離
兩代欠缺左一種基於了解、互相同尊重嘅基礎
亦冇一個橋樑去搭建出一個可以好好溝通交流嘅渠道
繼而製造左一種類似「上司」同「下屬」嘅關係
大部分人講「移民」嘅討論都離唔開：
1）要好多錢呀
2）阿邊個邊個個姨媽姑姐係果邊點點點
3）買樓點點點
4）外國好多稅經濟好差
好多時候，下一代都有唔同嘅諗法
問到佢地有冇同屋企人商量過「移民」都會回答
“冇啦！同佢地傾？盞嘈！” “佢地都唔會接受架啦！”之類嘅答案
感覺上大部分下一代嘅想法都係不獲上一代支持咁
2020年最快樂國家排名中香港係⋯
根據 3 月 20 日最新嘅 2020 年《最快樂國家報告》入面
當中排名共有 153 個城市/地區
第 1 位係 芬蘭 而頭 10 名國家入面歐洲佔咗頭 9 個席位
其中非歐洲城市為新西蘭排第 8
之後就係「移民」熱門嘅加拿大排 11 位，排 12 位嘅澳洲同排 13 位嘅 UK
亞洲嚟講，亞洲第 1 位係台灣排全球 25 名，第 2 位係新加坡排 31 名
而香港係全球排 78 名，中國大陸則排 94 名
有趣嘅 Insights 同反思：
「做人最需要了解自己真正想追求乜嘢？」
未賺到錢上岸嘅「月光族」嚟講錢係非常重要
但無論你係賺到少少錢嘅中產或者係上咗岸嘅富人
金錢冇因為你擁有而減少你嘅煩惱
更可能因為錢而產生左其他嘅引伸煩惱
物質帶比我哋嘅虛榮反而帶嚟空虛同貪婪
最後追了大半輩子你發覺原來只是一堆數字
兜咗咗大個圈返返到「移民」嘅依個 topic
基本嚟講地球上係冇《淨土》
每一個地方的確都會有佢哋存在嘅問題
但係每一個人都係獨一無二嘅
都有獨立思維同有自己想追求嘅生活
有時候社會嘅氛圍或者身處嘅社會周遭嘅環境
會令你盲目咗隨波逐流咁係下無意識地同其他人作出比較⋯
有時抽空一下思維⋯
唔需要話比其他人知生活有幾精彩富足
真正令係人生旅程入面活得快樂嘅⋯
現實可能係好簡單但卻遙不可及甚至背道而馳緊
亦都可能只係對住三歲嘅細路女面對住佢天真無邪嘅快樂而得到嘅滿足
其實人越大就越會將事情複雜化同真正嘅快樂走得越來越遠
但當然啦，「移民」唔等於快樂，兩者並冇關聯性
係一家人共同去挑戰嘅一個人生旅程
就算一齊錯都會一齊去克服返件事
總好過一個人啱晒而睇住自己嘅親人去受苦受難吖
咁作為一個家庭嘅Leader 辛苦少少去plan 好件事
令大家走少D 冤枉路同分享成果
或者係另一個更高層次嘅成功感呢？
