每逢假期總會同三五知己，屋企人，另一半去旅行，唔知你地會唔會期待食飛機上面嘅飛機餐呢？抑或會留返個肚等去到目的地享受當地美食？
當你食緊飛機餐，嘆緊熱咖啡，飲緊凍冰冰嘅果汁汽水嘅時候，專業嘅空中服務員其實已經開始準備緊唔同方面嘅工作，由一上機檢查安全設備，確保有足夠嘅飛機餐、飲品、毛氈，到起飛後「準備餐點、派餐、‘Coffee / Tea’、收餐、處理乘客各樣嘅要求、整理洗手間」等等。其實空服員嘅職責比大家想像中嘅「空中侍應」複雜得多。
小編訪問咗幾位年資較深嘅空服員，等小編話比大家知，空服員係飛機上面除左派餐收餐外，仲有咩角色啦⋯
1. 廚師
香港幾間主要航空公司嘅飛機餐，都係由航空膳食公司提供，食物煮熟後再經冷藏處理，每天運載到每個航班，再由空服員用飛機上嘅烤爐加熱後派到每位客人手中。用烤爐加熱看似簡單，但其實加熱嘅時間都會直接影響飛機餐嘅美味度，例如：牛扒或早餐奄列，炒蛋嘅加熱時間，其實都要比其他食物短，如果加熱時間太長，乘客有機會食到咬唔爛嘅牛扒或者係綠色嘅雞蛋。除咗加熱餐食，其實有部分日本航空公司嘅頭等艙甚至要空服員喺飛機上洗米煲飯或者落水煮拉麵、烏冬，務求乘客可以嘗到有質素嘅餐食。
2. 急救員
唔知大家坐飛機嘅時候有冇曾經遇過有其他乘客唔舒服？相信果一刻同行嘅家屬一定會非常緊張，如果附近咁岩搵唔到當值緊嘅空服員，記得立即利用頭頂上鐘仔（ 服務鈐 Call Light）呼喚空服員尋求協助。其實航空公司對依方面都設有一定嘅措施。首先，剛入職嘅空服員需要訓練至少 3 星期嘅專業安全訓練，其後每年都需要重溫安全上嘅知識，如逃生程序，急救知識 ( 心肺復蘇法，心臟病、頭暈、哮喘、機上接生等等嘅處理方法 ) 等等。除此以外，飛機上亦可透過無線電向指定緊急醫療中心尋求協助，務求解決乘客當前嘅情況。
3. 清潔人員
無論係短途機或長途機，大家都有機會用到洗手間，飛行途中，不時都會遇上氣流，去緊洗手間嘅大家少不免會唔小心整濕左地下，又或者洗完手，洗手間嘅抹手紙剛好用完，就唯有 'fing' 乾手上嘅水，或多或少都會唔覺意整濕個洗手間。平日係公共廁所，都會有偉大嘅清潔人員細心咁為大家清理洗手間，但係飛行途中，空服員並需要身兼多職，擔任清潔姐姐 / 哥哥，因為大部分嘅航空公司都會規定空服員需要定時清理航班上嘅洗手間，保持清潔衛生。
大家睇完唔知會唔會了解多左空中服務員「派餐，收餐 」以外嘅職責呢？其實行行都有本難念的經，我哋一齊加油！
